الشروط والأحكام

• الأسعار أصلاً بالدولار، والسعر بالجنيه بيتحسب بسعر الصرف وقت الطلب. السعر اللي بيظهرلك في صفحة الطلب هو اللي هتدفعه، ومش بيتغير بعد كده.
• طرق الدفع: فودافون كاش، إنستاباي، USDT، Binance Pay، أو رصيد محفظتك في المتجر.
• حوّل المبلغ المطلوب بالظبط. ولو بتدفع USDT، المبلغ اللي بيوصل لازم يكون كامل بعد رسوم التحويل.
• لازم تدفع في الوقت اللي مكتوب في صفحة الطلب. لو الوقت خلص ومفيش دفع، الطلب بيتقفل لوحده، وتقدر تعمل طلب جديد.
• التحويل لازم يكون من حسابك أو محفظتك إنت. أي دفع مش سليم أو مسروق بيتلغي طلبه، ومن حقنا نقفل الحساب.
• الأسعار والعروض ممكن تتغير في أي وقت، بس التغيير ده مش بيأثر على طلب اتعمل خلاص.

• أغلب المنتجات بتتسلّم على طول أول ما الدفع يتأكد: الكود أو بيانات الحساب بتظهر في صفحة الطلب وفي «حسابي».
• شوية منتجات بتتفعّل على إيميلك أو حسابك، ودي ممكن تاخد وقت. الوقت المتوقع مكتوب في وصف المنتج.
• لو المنتج خلص من المخزون بعد ما دفعت، بنسلّمه أول ما يتوفر أو بنرجّعلك فلوسك، وإنت تختار.
• إنت مسؤول تحفظ الكود أو البيانات اللي استلمتها، وماتديهاش لحد.

ضمان تشغيلي

• معناه إن المنتج شغال وقت ما بتستلمه. لو مااشتغلش، بلّغنا على طول وإحنا بنبدّله أو بنرجّعلك فلوسك.

ضمان كامل

• بيغطي المدة المكتوبة في اسم المنتج أو وصفه، زي «ضمان كامل» أو «ضمان 25 يوم». لو المنتج وقف خلال المدة دي من غير غلطة منك، بنبدّله أو بنرجّعلك جزء من التمن على حسب المدة اللي فاضلة.

علشان الضمان يفضل شغال

• اتبع تعليمات المنتج اللي في وصفه.
• ماتغيّرش الإيميل أو كلمة السر أو بيانات الحساب، إلا لو التعليمات قالت كده.
• ماتشاركش الحساب مع حد، ولو المنتج «مكان» في حساب مشترك ماتستخدمش غير مكانك.
• بلّغ عن المشكلة خلال مدة الضمان، ومعاك رقم الطلب.

• المنتجات الرقمية مابترجعش بعد ما الكود يتسلّم ويشتغل، لأن الكود اللي اتشاف مايتباعش تاني.
• بنرجّع الفلوس لو المنتج مااشتغلش ومقدرناش نبدّله، أو لو الطلب اتلغى من عندنا.
• الطلب اللي اتدفع من المحفظة فلوسه بترجع للمحفظة على طول. اللي اتدفع بفودافون كاش أو إنستاباي أو USDT بيرجع بنفس الطريقة اللي دفعت بيها، بعد ما نتأكد.
• لو حوّلت مبلغ غلط أو مرتين، كلّمنا وإحنا بنظبط الفرق، ليك أو لرصيد محفظتك.

• رصيد المحفظة علشان الشراء من المتجر. لو عايز ترجّعه فلوس، كلّمنا وبنشوف كل طلب لوحده.
• الكاش باك وأي هدايا أو أكواد خصم ليها شروط بتتكتب مع كل عرض، ونقدر نوقف أي عرض في أي وقت.
• أي رصيد أو كاش باك جه بطريقة مش سليمة، زي حسابات كتير لنفس الشخص، بيتلغي.

• تقدر تشتري كضيف، بس حساب الضيف محفوظ في المتصفح ده بس. اربطه بتليجرام أو واتساب أو إيميل علشان ماتخسرش طلباتك.
• إنت مسؤول عن أكواد التأكيد وكلمة السر بتاعتك. أي طلب بيتعمل من حسابك بيتحسب عليك.
• من حقنا نوقف أي حساب بيحاول يخدع المتجر، أو يدفع بفلوس مش بتاعته، أو يستخدم المتجر في حاجة مخالفة للقانون.